O próximo día 1 comeza unha nova edición do campamento Sementeira, que rematará o 29 de agosto. Na primeira quenda, a do mes de xullo, hai 33 nenas e nenos inscritos con idades comprendidas entre os 3 e os 12 anos, na súa maioría alumnado do CEIP San Ramón ou ben con familiares empadroados en Moeche. Das 40 solicitudes recibidas, so 33 puideron ser admitidas, e 12 xa reservaron praza para o mes de agosto. Con todo, como é habitual, do 15 e o 23 de xullo abrirase un período de inscrición para aquelas familias que só poidan ou queiran acudir ao segundo mes do campamento.
A área de Benestar Social e Igualdade publicou hoxe no tablón de anuncios do Concello a resolución da alcaldía co listado de nenas e nenos admitidos e excluídos no Sementeira 2025, que comeza o próximo 1 de xullo.
Sementeira proporalles unha chea de actividades educativas e de lecer cada semana en espazos tan variados como o Castelo, a área recreativa de Souto Grande, a piscina municipal ou o recinto feiral, co seu circuíto de educación viaria, ademais do pavillón polideportivo, xa tradicional espazo base deste campamento.
E é que Sementeira sempre se distinguiu por iso, pola súa itinerancia, e por estar concibido como unha aventura de descubrimento da cultura, o patrimonio e os recursos ambientais do municipio, ademais de traballar valores e habilidades como o da igualdade, o respecto, a escoita activa, a responsabilidade e a corresponsabilidade. Ao longo dos próximos dous meses as actividades serán moi diferentes: acuáticas, científicas, creativas, de reciclaxe, deportivas, artísticas tecnolóxicas, excursións, etc., que apostan sempre polo traballo en grupo da rapazada. Ademais, durante o campamento tamén se agardan visitas sorpresa de persoas de dentro e fóra de Moeche para compartir coas nenas e nenos coñecementos en distintos ámbitos.
Información ás familias
Para a quenda de xullo admitíronse 33 solicitudes, das que a totalidade foron presentadas por familias empadroadas no concello, con rapazada matriculada no CEIP San Ramón ou con vinculación familiar en Moeche. Para informar das actividades e sobre todos os aspectos de Sementeira vaise celebrar unha xuntanza nos vindeiros días -contactarase coas familias para fixar o día e a hora.
Inscricións para a quenda de agosto do Sementeira
De cara á segunda quenda de Sementeira, a do mes de agosto, o Concello xa recibiu 12 solicitudes de preinscrición presentadas por familias con acceso prioritario (alumnado CEIP San Ramón, familiares con empadroamento e/ou vinculación laboral). Quen teña interese en dispor de praza só para o segundo mes do campamento debe presentar a documentación entre o 15 e o 23 de xullo, ambos días incluídos, ben a través da Sede Electrónica municipal ou presencialmente no Concello.
A prelación na asignación de prazas será a mesma que para a quenda de xullo, é dicir, primeiro as solicitudes dos nenos e nenas do CEIP San Ramón, en segundo lugar as familias con algún membro empadroado no concello de Moeche (por esta orde: nais e pais, avoas e avós) e, por último, as familias con algún dos membros con vinculación laboral no municipio.
Listado de admitidos e excluídos
Ficha de solicitude de inscrición – DESCARGAR EN FORMATO EDITABLE | DESCARGAR EN PDF
Folla médica – DESCARGAR EN FORMATO EDITABLE | DESCARGAR EN PDF
Folla de autorizacións – DESCARGAR EN FORMATO EDITABLE | DESCARGAR EN PDF
Descargar bases e información do programa
O Campamento Sementeira conta coa colaboración económica do Plan Corresponsables co financiado coa Consellería de Promoción do Emprego e Igualdade e polo Ministerio de Igualdade
Últimos comentarios