Hoxe tivo lugar a primeira xuntanza informativa  dos alcaldes e alcaldesas  dos concellos das comarcas de Ferrol, Eume e Ortegal que  están no máximo nivel de restricións  e os representantes da Consellería de Sanidade, o conselleiro de Sanidade, Julio García Comesaña,e  o secretario xeral técnico, Alberto Fuentes, e o xerente da Área Sanitaria de Ferrol, Ángel Facio. O obxectivo desta reunión, celebrada por videoconferencia, foi aclarar as posibles dúbidas ante a aplicación das novas medidas e  valorar a nova situación na comarca

Os representantes da consellería trasladaron a preocupación pola gravidade da situación, especialmente  pola  presión  hospitalaria e o incremento incesante de casos activos  e insistiron na importancia de que todas as persoas cumpramos as normas sanitarias .

Na primeira parte da reunión o  secretario xeral informou de que a dia de hoxe o total de casos activos na área sanitaria de Ferrol é 1192 , nesta cifra non se inclúen  os casos activos en residencia de maiores. Destes 1192 casos,   110 están hospitalizados e os restantes  en domicilio, onde se lles fai  o seguimento médico. O  secretario xeral tamén achegou os datos  por concellos.  Segundo a información  ofrecida  á alcaldesa , Moeche  ten a día de hoxe 20 de xaneiro :

– Casos directos activos hoxe 20 de xaneiro: 34

– Incidencia acumulada nos últimos  14 días:  24, o que vén significar unha incidencia de 1850 por cada 100.000 habitantes.

Deuse conta das  medidas máis salientables do novo nivel de  restricións no concello de Moeche e os  demais concellos integrados no nivel máximo:

  • Peche perimetral e individual de todos os concellos afectados da comarca. Poderase saír do concello exclusivamente por razóns laborais, sanitarias, educativas e outras excepcións previstas na normativa (coidado de maiores ou persoa a cargo, da horta,  dos animais, etc.)
  • Para os establecementos de hostalería: o interior permanecerá pechado ao público e só poderán abrir as terrazas (máximo do 50 % da ocupación) ata as 18.00 horas.
  • Os grupos, como en calquera espazo, serán como máximo de 4 persoas.
  • Poderán prestarse servizos de entrega a domicilio (ata as 00.00h) ou para a súa recollida no local e consumo a domicilio (ata o toque de queda).hora.

Convén lembrar que estas medidas súmanse ás que xa tiñamos ata agora:

  • Toque de queda ás 22.00 horas ata as 06.00 h
  • Grupos máximo de 4 persoas
  • Enterros e cremacións máximo 25 asistentes.
  • Velorios en interior, 10 persoas, e en exterior, 25.
  • Comercios aforo ao 50% da súa capacidade

E tamén convén termos presentes as recomendacións de reducir a mobilidade o máximo posible, limitándose ás actividades esenciais.

Tras expoñer os datos e medidas, os alcaldes e alcaldesas comunicaron as súas dúbidas  en canto á súa aplicación, que se centraron  nas excepcións ás limitacións de mobilidade, nas normas de piscinas e vestiarios, a posibilidade de facer peches por agrupacións de concellos  e  a inclusión do persoal do SAF no calendario máis inmediato do programa de vacinación.  O conselleiro informou de que esa incorporación estaba prevista de acordo coa definición dos grupos de maior a menor do calendario de vacinación e agárdase empezar a vacinar a partir de marzo.

A alcaldesa de Moeche, Beatriz Bascoy, agradeceu  a convocatoria desta reunión e a información puntual que a diario está  a ofrecer o xerente da Área Sanitaria,  Ángel Facio. A rexedora trasladou a súa preocupación por unhas medidas  urxentes  para a realización ou non de feiras e mercados e o seu control nesta situación en comparación cos centros comerciais e establecementos similares. O secretario xeral manifestou de momento desde a Administración autonómica non hai ningunha nova disposición ao respecto e de momento será decisión  dos concellos suspender estes eventos ou non. A alcaldesa  comunicou a decisión municipal de suspender a próxima feira, por ser un espazo de difícil control respecto do cumprimento estrito das medidas e sobre todo no marco  da elevada incidencia  no municipio. O secretario xeral  valorou  positivamente a decisión municipal e coincidiu  co alcaldesa en que diferente é a situación do mercado, facilmente controlable o acceso,  o mantemento das distancias e  o uso de máscaras.

Na segunda parte da reunión,  centrada  en temas asistenciais, a  alcaldesa  comunicoulle ao xerente da Área Sanitaria   unha das situación máis preocupante que se empeza a dar co incremento de casos activos, a de  persoas de avanzada idade confinadas  por ser positivos, soas nos seus domicilios,  co único soporte do SAF municipal e  “coa dificultade de manter o soporte veciñal ou familiar  polo risco de contaxio” O xerente comprometeuse a trasladar esta problemática que afecta aos de maior idade.

Bascoy sinala  que “Moeche reorganizou e incrementou o SAF, coa contratación de  tres persoas nas últimas semanas, e puxo en marcha o servizo de axuda na compra  de alimentos e medicamentos pero  estas situacións  puntuais que se están dando van máis alá dun servizo de SAF con recursos limitados” Por outro lado,  o concello está achegando material de protección a aquelas persoas que están pendentes das necesidades de  persoas  con positivos confirmados, maiores e soas.

O conselleiro pechou a reunión sinalando que as medidas adóptanse progresivamente  segundo indica a situación e que estas xuntanzas se repetirán cada semana mentres nos manteñamos no máximo nivel de restricións.

CONVÉN NON ESQUECER :

  • Cumprimento das normas sanitarias: distancia interpersoal, uso de máscara e lavado de mans,
  • En caso de síntomas chamar ao 900 400 116
  • De ser contacto cun positivo, lembrar que  debemos autoconfinarnos ata pasarmos a corentena e obedecer as indicacións do persoal sanitario.

Enlace a  restricións actuais