O Pleno reunirase en sesión ordinaria o xoves 19 ás 20.00 horas, na que, ademais dos habituais asuntos de trámite, someterase a aprobación o Proxecto de instalación de contadores nos ramais principais da rede de abastecemento de auga e varias chaves de corte, o que vén completar a primeira fase executada hai uns meses na que se instalaron contadores nas instalacións municipais, no propio depósito e unha válvula redutora. Este proxecto ten un importe de 18.168,77€ e estará co-financiado pola Deputación da Coruña ao abeiro do Plan complementario do Plan Único 2017, que tamén destina 75.000,00€ para a mellora da iluminación da AC-862.
Determinaranse as datas das festas locais para o ano 2017, someterase a aprobación a creación do Consello Local da Infancia e Adolescencia e da Mesa de Coordinación interna para a participación infantil, como pasos previos para obter a condición de Concello Amigo da Infancia.
Así mesmo, debaterase a adhesión do Concello ao protocolo da campaña En Negro contra a violencia, un programa contra a violencia de xénero no que participan 3 Deputacións e 52 concellos, así como a adhesión de Moeche á Xunta prodevolución do Pazo de Meirás impulsada pola Deputación da Coruña.
Como en toda sesión ordinaria do Pleno, ao rematar o último punto da orde do día, abrirase a quenda das veciñas e veciños asistentes.
Últimos comentarios