O Concello de Moeche abre o prazo de inscrición para as actividades deportivas do programa Verán en Acción 2026, que se desenvolverán durante os meses de xullo e agosto. Natación infantil, aquagym para persoas adultas, tenis e exercicio físico ao aire libre conforman unha oferta pensada para todos os grupos de idade.
Prazo de inscrición e inicio das actividades
Xa poden formalizarse as inscricións, de luns a venres, en horario de atención ao público (08.30 a 14.00 h), no Rexistro Xeral da Casa do Concello, ou ben de forma telemática a través da sede electrónica municipal (www.moeche.gal). As actividades darán comezo na primeira semana de xullo e rematan a finais de agosto.
As follas de inscrición están dispoñibles no Departamento de Deportes, no Rexistro Xeral e ao final desta nova.
Programa de actividades
| Actividade | Público | Horario | Lugar | Prezo |
|---|---|---|---|---|
| Natación infantil — iniciación | Menores de 16 anos | Mércores e venres, 12.30–13.15 h | Piscina municipal de Soutogrande | 15 €/mes · 30 € curso completo |
| Natación infantil — perfeccionamento | Menores de 16 anos | Mércores e venres, 11.30–12.30 h | Piscina municipal de Soutogrande | 15 €/mes · 30 € curso completo |
| Natación e aquagym para adultos | Maiores de 16 anos | Luns e xoves, 12.00–13.00 h | Piscina municipal de Soutogrande | 20 €/mes · 40 € curso completo |
| Tenis infantil | Menores de 16 anos | Luns, 11.00–12.00 e 12.00–13.00 h (dous grupos segundo nivel) | Pistas de tenis e pádel de Abade | 20 €/mes · 40 € curso completo |
| Exercicio no parque | Maiores de 55 anos | Martes e xoves, 10.30–11.30 h | Parque biosaudable (Casa do Concello) | 12 €/mes · 9 €/mes maiores de 65 anos |
Están previstas bonificacións nos prezos para familias numerosas, maiores de 65 anos, persoas con discapacidade recoñecida superior ao 33 %, titulares do carné xove e para aquelas unidades familiares con máis dun participante na mesma actividade. As persoas sen capacidade económica acreditada poderán solicitar a exención total da cota, previo informe dos Servizos Sociais Municipais.
Andainas nocturnas Entre lusco e fusco
Un verán máis, o programa de rutas nocturnas Entre lusco e fusco convida á veciñanza a descubrir o territorio de Moeche á caída da noite. As datas desta edición son:
- Sábado 4 de xullo, por San Xurxo, ás 21.30 h
- Sábado 8 de agosto, por Santa Cruz, ás 21.00 h
As andainas son de balde. É preciso levar lanterna ou foco, chaleco reflector e roupa e calzado axeitados. Os menores deberán ir acompañados dun adulto. As inscricións realizaranse a través do correo electrónico daniel.feijoo@moeche.gal.
Fichas de inscrición:
Natación infantil perfeccionamento
Últimos comentarios